ინტიმური ჰიგიენა: სხეულის მოვლის დროს დაშვებული შეცდომები

ინტიმური ჰიგიენა საკმაოდ მგრძნობიარე საკითხია და მის შესახებ სახალხოდ თითქმის არ საუბრობენ. ხშირად ოჯახშიც ეუხერხულებათ ამ თემის განხილვა, შედეგად კი ბავშვები იზრდებიან ისე, რომ სხეულის მოვლისას ბევრ შეცდომას უშვებენ. ამ შეცდომების მიზეზი უმეტეს შემთხვევაში სიზარმაცე კი არ არის, არამედ არაკომპეტენტურობა და ინფორმაციის ნაკლებობა. მოდით განვიხილოთ, თუ რა შეცდომებს უშვებს ყოველი მეორე ქალი სხეულის მოვლის საკითხში.

გაწმენდის არასწორი ტექნიკა და შეუსაბამო საშუალებები

ექიმები აღნიშნავენ, რომ ქვედა ტანის დაბანა და გაწმენდა მხოლოდ წინიდან უკან უნდა ხდებოდეს. წინააღმდეგ შემთხვევაში შესაძლოა ბაქტერიები უკანა ტანიდან წინ მოხვდეს და დაარღვიოს გენიტალიების მიკროფლორა, რაც ხშირად ცისტიტსაც იწვევს.

ანტიბაქტერიული საპონი და პარფიუმერული გელები შეიცავს აგრესიულ აქტიურ ნივთიერებებს, რომლებიც აზიანებს ინტიმური ადგილის მგრძნობიარე კანს და იწვევს მის გაღიზიანებას. გინეკოლოგები ქალებს ჩვეულებრივი თბილი წყლით დაბანას ურჩევენ ან სპეციალური ნეიტრალური საშუალებების გამოყენებას. ასევე არ არის რეკომენდებული ზეთოვანი დუშგელის წასმა ინტიმურ ადგილებში, რადგან მისი კომპონენტებიც საზიანოდ მოქმედებს ლორწოვან გარსზე. სკრაბების გამოყენებაც გამორიცხულია, თუმცა წვრილი აბრაზიული ნაწილაკების შემცველი საშუალებები შეიძლება შეარჩიოთ ექიმთან კონსულტაციის შედეგად.

სპეციალისტები გვაფრთხილებენ, რომ ინტიმური ადგილის ბუნებრივი სუნის ჩახშობა არამხოლოდ უაზროა, არამედ სახიფათოც. არომატიზებული ტუალეტის ქაღალდი, ხელსახოცები ან სპეციალური დეოდორანტები ფულის ფლანგვასთან ერთად ალერგიული რეაქციების პროვოცირებასაც ახდენენ. ექიმის რეკომენდაციის გარეშე გამორეცხვების ჩატარება ასევე დაუშვებელია, რადგან ამ დროს სასარგებლო ბაქტერიებიც გამოირეცხება და მიკროფლორა ირღვევა.

- რეკლამა -

ჰიგიენური ნივთების გამოყენების შეცდომები

პირად ჰიგიენაში ყველაზე გავრცელებულ შეცდომებს შორის განსაკუთრებით გამოირჩევა შემდეგი:

• პირსახოცის არასწორი გამოყენება. იდეალურ შემთხვევაში სხეულის ინტიმური ნაწილისთვის ცალკე პირსახოცი უნდა გქონდეთ გამოყოფილი. რეალობის გათვალისწინებით საკმარისია ის იყოს შედარებით ახალი და სუფთა. ბიკინის ზონის უხეშად და დიდხანს გამშრალება მისი გაღიზიანების მიზეზი ხდება.
• ჩაზრდილი თმის იგნორირება. თმის ჩაზრდა ძირითადად შუგარინგის ან ეპილაციის შედეგად ხდება. ამის იგნორირება დაუშვებელია, რადგან შეიძლება ჩირქგროვები განვითარდეს. მათი თავიდან ასაცილებლად გარკვეული დროის განმავლობაში მოერიდეთ თმის მოშორების პროცედურებს.
• ჰიგიენის საშუალებების იშვიათი გამოცვლა. მენსტრუაციის დროს ტამპონისა და საფენების ცვლა რეკომენდებულია 2-4 საათში ერთხელ. გინეკოლოგები ამ ორი საშუალების 4 საათზე მეტ ხანს გამოყენებას არ ურჩევენ, ვინაიდან მათშიც მრავლდება ბაქტერიები.
• ყოველდღიური საფენების გამოყენება. ექიმები ყოველდღიური საფენების, განსაკუთრებით კი არომატიზატორებიანის, სისტემატურ გამოყენებას არ გვირჩევენ. ეს საფენები ბლოკავს ჰაერის მოძრაობას, რაც ბაქტერიების სწრაფ გამრავლებას უწყობს ხელს.
• უხარისხო თეთრეულის ტარება. ხელოვნური მასალისგან დამზადებული საცვლები აფერხებს ჰაერის ცირკულაციას და არ შთანთქავს ტენს, რაც მავნე ბაქტერიების დაგროვებას იწვევს.

სწორი ჩვევების ჩამოყალიბება

ინტიმური ჰიგიენის კულტურა ბავშვობიდანვე ყალიბდება. სწორედ ამიტომ მნიშვნელოვანია, რომ სხეულის მოვლის დროს დაშვებული შეცდომების შესახებ ვიცოდეთ რაც შეიძლება მეტი და ეს ცოდნა მომავალ თაობასაც გავუზიაროთ. ქალების უმრავლესობა ამ შეცდომებს არა მიზანმიმართულად, არამედ ინფორმაციის ნაკლებობის გამო უშვებს.

მენსტრუაციასთან დაკავშირებულ საკითხებზე მეტი ინფორმაციის მისაღებად კი სასარგებლო იქნება გაეცნოთ, თუ რამდენ სისხლს კარგავენ ქალები მენსტრუაციის დროს და ყურადღებით დააკვიროთ საკუთარ თავს.

დასასრულს შეგახსენებთ: ინტიმური ჰიგიენა ჯანმრთელობის განუყოფელი ნაწილია. სწორი ჩვევები, ნეიტრალური საშუალებები, ხარისხიანი ბუნებრივი მასალის თეთრეული და დროული ვიზიტები გინეკოლოგთან საუკეთესო პრევენციაა ნებისმიერი პრობლემის თავიდან ასაცილებლად.