გულიკო ჩაფიძის რჩევები: რა უნდა გავაკეთოთ, რომ გულმა დიდხანს გვიერთგულოს

92 წლის ლეგენდარული კარდიოლოგი გულიკო ჩაფიძე გვიზიარებს მარტივ, მაგრამ ძალიან მნიშვნელოვან რჩევებს — რა უნდა გავითვალისწინოთ იმისთვის, რომ გულმა დიდხანს გვიერთგულოს. მისი სიტყვები თბილი და პრაქტიკულია, ისევე როგორც თავად ექიმი.

გაზაფხულ-შემოდგომაზე განსაკუთრებული სიფრთხილეა საჭირო

მათ, ვინც იცის, რომ გულის დაავადებები აქვს, გაზაფხულ-შემოდგომაზე ექიმის მიერ გამოწერილი წამლების მიღება აუცილებელია. გარდამავალი პერიოდი ორგანიზმისთვის რთულია და სწორედ ამ დროს ხდება ხოლმე დაავადებების გამწვავება. ამიტომ ამ სეზონებზე ყურადღების გაორმაგება ნამდვილად ღირს.

ფეხით სიარული — ზომიერად და გარეთ

ფეხით სიარული და აქტიურობა ძალიან სასარგებლოა, თუმცა ყველაფერში ზომიერება სჭირდება. ზოგი საერთოდ არ დადის, ზოგი კი საჭიროზე მეტს დადის — ორივე უკიდურესობა არ არის კარგი.

რთულია ერთიანი ნორმის განსაზღვრა — ეს ინდივიდუალურია და ჯანმრთელობის მდგომარეობაზეა დამოკიდებული. ვინმეს ნახევარი კილომეტრის გავლა უჭირს, სხვა სამ-ხუთ კილომეტრს ადვილად გადის. ამიტომ კონკრეტული რეკომენდაციისთვის ექიმს უნდა მიმართოთ.

- რეკლამა -

მნიშვნელოვანია გვახსოვდეს: ფეხით სიარული ნიშნავს გარეთ, ჰაერზე სიარულს. დიასახლისები ხშირად ამბობენ, ყოველდღე ბევრს ვდივარო, მაგრამ სამზარეულოდან საძინებლამდე სიარული ამაში არ ჩაითვლება. გარეთ გასვლა აუცილებელია.

• გულ-სისხლძარღვთა დაავადებების მქონე პირებისთვის სირბილი არ არის საჭირო — მხოლოდ მშვიდი სიარული.
• წოლა და პასიურობა სასარგებლო არ არის — აქტიურობა საჭიროა.
• ძილის წინ სცადეთ გარეთ გახვიდეთ და ნახევარი საათი მშვიდად ისეირნოთ, შემდეგ დაბრუნდით და დაწექით.

კვება, ძილი და სიმშვიდე

გულისთვის შაქრიანი და ზედმეტად ცხიმიანი საკვები სასარგებლო არ არის. წონის კონტროლიც მნიშვნელოვანია — როგორც გასუქება, ისე ზედმეტად გახდომა პრობლემურია. აქაც ოქროს შუალედი ყველაზე სწორი გზაა. გარდა ამისა, არსებობს საკვები პროდუქტები, რომლებიც სისხლძარღვებს ამწმენდს და გულის შეტევის რისკს ამცირებს.

ქართველებს ღამით კვება გვიყვარს — ეს ჩვევა კი სასურველი არ არის. გამოიმუშავეთ წესი, რომ გვიან არ ჭამოთ.

ძილის წინ ეცადეთ მშვიდად იყოთ. ძილის წინ მარტივი მასაჟი ან მუსიკის მოსმენა შეიძლება ნამდვილ თერაპიად იქცეს — ვისაც რა ჟანრი უყვარს, იმას უსმინოს.

სიყვარული და სითბო — გულის საუკეთესო წამალი

უარყოფითი სტრესი არაფრისთვის ვარგა — ეს ყველამ იცის. გარემო და ადამიანები უნდა დაწყნარდნენ, მეტი სიყვარული და პატივისცემა უნდა იყოს ერთმანეთის მიმართ. რაც მეტი სიმშვიდე იქნება, მით უკეთ იქნებიან ადამიანები.

- რეკლამა -

გულიკო ჩაფიძე ახსენებს ძველ ქართულ ჩვეულებას: როდესაც ბავშვი ავად ხდებოდა, დედა, დეიდა თუ ბებია გიტარაზე უკრავდა, უმღეროდა, დადებითი ემოციით ავსებდა პატარას. ეს ამშვიდებდა და ახალისებდა — ნამდვილი თერაპია იყო.

მოფერება ყველას და ყველაფერს სჭირდება. ნუ დაგვენანება, ვუთხრათ ახლობელს — მიყვარხარ, მომწონხარ. ბევრი სითბო გვაქვს და გავიმეტოთ ერთმანეთისთვის. ეს განწყობაზე მოქმედებს და ადამიანს უკეთეს ადამიანად აქცევს.

გავთავისუფლდეთ ნეგატივისგან — ეს უმარტივესი და ამავდროულად ყველაზე ძნელი ნაბიჯია ჯანმრთელობისკენ.

გულიკო ჩაფიძის რჩევები მარტივია, მაგრამ სიღრმისეული — ზომიერი მოძრაობა, სწორი კვება, ხარისხიანი ძილი და, რაც მთავარია, სიყვარული ერთმანეთის მიმართ. სწორედ ეს არის ის საფუძველი, რომელზეც გულის ჯანმრთელობა და ბედნიერი ცხოვრება დგას.